Кніга вядомай беларускай пісьменніцы Алены Масла «Балотныя прыгоды. Цікавінкі ад Бульбінкі і Журавінкі», з цудоўнымі ілюстрацыямі мастака Аксаны Аракчэевай, прысвечана таямнічаму і захапляльнаму свету беларускіх балот.У займальнай форме аўтар знаёміць дзяцей з асаблівасцямі ўтварэння балот, іх відамі і значэннем у прыродзе. Асобнае месца ў кнізе адведзена знаёмству з жывёльным і раслінным светам балот.

Разам з галоўнымі героямі кнігі — цікаўным і дасведчаным хлопчыкам Бульбінкам і дзяўчынкай Журавінкай — удзельнікі клуб-класа «Капелька», якія наведалі гарадскую бібліятэку №3, адправіліся ў неверагоднае «Казачнае падарожжа па балотных абшарах». Маленькія чытачы наведалі хатку баброў, высветлілі, чаму ласі скідаюць рогі і ці можа выдра працаваць карэспандэнткай. Даведаліся, як правільна сабрацца на балота, паспрабавалі знайсці балотныя ягады сярод іншых, падмацаваліся прыгатаванымі скібкамі, бо ў кнізе ёсць і кулінарныя рэцэпты, пагулялі ў займальную гульню па матывах казкі.