У кожнага народа свая родная мова, а для нашага народа родная мова — беларуская. Яна прайшла доўгі шлях, на якім былі як часы росквіту, так і часы заняпаду.

Каб зацікавіць дзяцей беларускай мовай і літаратурай, а таксама далучыць іх да беларускай культуры, гарадская дзіцячая бібліятэка №4 правяла моўную хвілінку «Сябруем з роднай мовай». У гульнёвай форме дзеці паказалі веды па раздзелах мовазнаўства і літаратуразнаўства. Яны не толькі пазнавалі, але і сістэматызавалі раней набытыя веды па лексіцы і фразеалогіі, пашырылі свой слоўнікавы запас. Пры выкананні асобных заданняў рабяты праявілі кемлівасць і знаходлівасць, пашырылі веды аб гісторыка-культурнай спадчыне Беларусі. Хлопчыкі і дзяўчынкі ўзбагачалі свой слоўнікавы запас, выказвалі павагу да роднага слова праз знаёмства са спадчынай беларускага народа. Удзельнікі мерапрыемства ўбачылі і адчулі наколькі багатая і прыгожая, мілагучная і самабытная беларуская мова.

Урок роднай мовы «Размаўляем па-беларуску» праходзіў у рамках дэкады беларускай кнігі «На роднай мове я чытаю» у цэнтральнай бібліятэцы імя А.С. Пушкіна. Родная мова — гэта тое, што нас аб'ядноўвае і робіць унікальным. Разам мы разважалі, успаміналі песні, загадкі; з кнігі Кастуся Жука «Бегемот без ботаў» чыталі скарагаворкі з кнігі «Пераначуеш — больш пачуеш», чыталі прыказкі і прымаўкі. Потым загадвалі загадкі на рускай мове, а адгадкі гаварылі на беларускай мове. У канцы мерапрыемства паглядзелі мультфільм на беларускай мове «Ліса, мядзведзь і мужык».

У Велаўскай сельскай бібліятэцы прайшла конкурсная праграма «У роднай мовы роднае карэнне». Падчас мерапрыемства дзеці пазнаёміліся з гісторыяй і культурай роднай мовы, дазналіся, што родная мова — генетычны код любой нацыі, які патрэбна любіць, шанаваць і берагчы. Адчуць прыгажосць і хараство роднай мовы прысутным дапамагло чытанне вершаў класікаў беларускай літаратуры (Я. Купалы, Я. Коласа, М. Танка і інш.). Вучні з задавальненнем прынялі ўдзел ў віктарыне, разгадвалі крыжаванку, шыфроўкі, перакладалі словы з рускай мовы на беларускую, чыталі хуткамоўкі на беларускай мове. У канцы сустрэчы ўдзельнікам мерапрыемства было дадзена «10 парад, як пачаць размаўляць па-беларуску», бо трэба размаўляць на роднай мове, каб яна не адышла ў нябыт і ў забыццё. Кожны з вучняў атрымаў закладку «Размаўляй са мной па-беларуску». Пасля мерапрыемства бібліятэкар правёў агляд кніжнай выставы «Да роднай мовы крок зрабі».

У Барбароўскай сельскай бібліятэцы прайшла акцыя «Рускай мове дай разгрузку — размаўляй па-беларуску». На мерапрыемстве для ўдзельнікаў акцыі былі падрыхтаваны розныя заданні: «Слова трапнае і дасціпнае», «Граматычнае лато», «Папацей, грамацей», «Аматары беларускага фальклору», «Пытанне-адказ» і іш. Усе ўдзельнікі акцыі ахвотна выконвалі заданні прыгадвалі, перакладалі, тлумачылі, цытавалі беларускія прыказкі і прымаўкі, рэдкаўжывальныя словы. Таксама ўвазе наведвальнікаў была прадстаўлена кніжная выстава «Слаўлю цябе, беларускае слова».

У гарадской бібліятэцы №1 зладзілі вершаваны ланцужок «Родныя словы». На кніжнай выстаўцы «Роднай мовы гук чароўны» былі прадстаўлены кнігі вершаў беларускіх пісьменнікаў. Як ланцужок складаецца са звенняў, так і кнігі на выстаўцы ўяўляюць сабой тэматычныя звенні. Звяно «З любоўю да роднага краю» складаецца з вершаў Максіма Багдановіча, Янкі Купалы, Петруся Броўкі, Веры Вярбы. У звяне «Слова аб роднай прыродзе» сабраны вершы Васіля Віткі, Рыгора Барадуліна, Максіма Танка пра прыгажосць беларускай прыроды. Завяршае ланцужок звяно «Промні маленства», прысвечанае самай светлай пары чалавека — дзяцінству. Удзельнікам прапаноўвалі ўзяць з выстаўкі кнігу і прачытаць верш уголас, або па чарзе з таварышам (ланцужком). Чытачы мелі магчымасць адчуць прыгажосць, меладычнасць паэтычных твораў, праявіць артыстычныя здольнасці.

У Козенскай сельскай бібліятэцы прайшло літаратурнае падарожжа ў гісторыю кнігі к «Жыве ў вяках беларускае слова» для вучняў 5 «А» класа Козенскай СШ. У першай частцы мерапрыемства ўдзельнікі пазнаёміліся з гісторыяй узнікнення кнігі, даведаліся шмат цікавага пра гісторыю станаўлення і развіцця беларускай мовы, кнігадрукавання, пра беларускіх асветнікаў. У другой частцы мерапрыемства дзецям патрэбна было прайсці некалькі інтэлектуальных выпрабаванняў: «Таямніцы мовы» — удзельнікі перакладалі на беларускую мову словы і словазлучэнні, «Беларускія пісьменнікі і іх творы» — адгадвалі назвы твораў па прапанаваным урыўкам і называлі аўтараў, «Беларускія прыказкі і прымаўкі» — састаўлялі прыказкі, «Беларускі фальклор» — адгадвалі загадкі, чыталі хуткамоўкі, пісалі свае любімыя словы на роднай мове. У кожным выпрабаванні ўдзельнікі хутка адказвалі на пытанні і паказвалі свае веды па беларускай мове, літаратуры, міфалогіі, этнаграфіі і фальклоры.