Бібліятэкар Крынічанскай сельскай бібліятэкі да 140-годдзя з дня нараджэння Якуба Коласа падрыхтавала і правяла для малодшых школьнікаў літаратурную гадзіну «Радкі, спазнаныя з маленства».

У час мерапрыемства бібліятэкар пазнаёміла прысутных з жыццёвым і творчым лёсам пісьменніка, вучні даведаліся пра яго сапраўднае імя, чаму ён абраў сабе такі псеўданім, дзе і ў якой сям’і нарадзіўся, кім працаваў.

Потым удзельнікі прынялі актыўны ўдзел у чытанні вершаў і казак пісьменніка, віктарыне «Я Коласа пачуў», а таксама ў бліц-віктарыне «Слова адгадаеш — цукерку атрымаеш» на веданне беларускай мовы.

Да мерапрыемства была аформлена кніжная выстава «Шчодры талент зямлі беларускай» на якой была прадстаўлена шматгранная спадчына мастака слова.